​Сустрэча з прэзідэнтам, спікерам Парламента і выступ перад дэпутатамі Камітэта па замежнай палітыцы і абароне. Ціханоўская працягвае візіт у Ірландыю Падчас візіту ў Ірландыю Святлана Ціханоўская правяла сустрэчу з прэзідэнтам Ірландыі Майклам Хігінсам. Ён выказаў поўную падтрымку беларусам, распавёў пра ірландскі досвед барацьбы за ідэнтычнасць і незалежнасць краіны, аднаўлення культуры і ідэнтычнасці, з чым у Беларусі шмат агульнага. Лідары абмеркавалі цяперашнюю сітуацыю з палітвязнямі, умовы ў турмах, важнасць падтрымкі беларускай дыяспары.  Акрамя таго, Святлана Ціханоўская сустрэлася са спікерам Ірландскага парламента Шонам О'Фергейлам. Яна распавяла пра апошнюю хвалю рэпрэсіяў супраць актывістаў і журналістаў, расказала пра барацьбу беларускіх добраахвотнікаў ва Украіне. Таксама Ціханоўская падзялілася інфармацыяй пра сітуацыю з Віктарам Бабарыкам і іншымі палітвязнямі і прапанавала ірландскім палітыкам выступіць з патрабаваннем даць доступ да палітвязняў для сваякоў і замежных дыпламатаў.  Па выніках сустрэчаў дамовіліся: – У ірландскім парламенце будзе створаная група «Сяброў дэмакратычнай Беларусі», як гэта ўжо зроблена ў 17 парламентах іншых краінаў.  – Дэпутаты возьмуць патранаж над палітвязнямі. Ужо 24 дэпутаты далучыліся да гэтай міжнароднай кампаніі.  – Парламент разглядзіць рэзалюцыю ў падтрымку незалежнасці і дэмакратыі ў Беларусі. Асобная ўвага будзе прысвечаная недапушчэнню размяшчэння ядзернай зброі. –  Будзе разгледжаная магчымасць стажыровак для беларусаў у офісах дэпутатаў парламента. На фота: Святлана Ціханоўская і прэзідэнт Ірландыі Майкл Хігінс.