​Ціханоўская, Латушка, Аляхновіч і Вячорка абмеркавалі з міністаркай фінансаў Польшчы праблемы беларускага бізнесу Святлана Ціханоўская распавяла, што нават у Польшчы беларускія прадпрымальнікі сутыкаюцца з дыскрымінацыяй і праблемамі з легалізацыяй, рэлакацыяй з Беларусі свайго бізнесу, супрацоўнікаў і іх сем’яў і адкрыцця банкаўскіх рахункаў. Эканамічны дарадца Ціханоўскай і адзін з кіраўнікоў Асацыяцыі беларускага бізнесу за мяжой (ABBA) Алесь Аляхновіч распавёў пра ініцыятыву эканамічнай каманды Ціханоўскай і ABBA стварэння гарантыйнага фонду для беларускіх кампаніяў у Еўрасаюза. Зараз гэта абмяркоўваецца з Еўракамісіяй і польскім фінансавым сектарам. Ён прапанаваў міністарцы падтрымаць гэтую ідэю. Таксама Аляхновіч распавёў пра важнасць працэсу верыфікацыі беларускага бізнесу, каб аддзяліць сумленны прыватны бізнес ад фірмаў, якія падтрымліваюць рэжым, вайну і дапамагаюць з абыходам санкцыяў. У сваю чаргу намеснік кіраўніцы Аб'яднанага Пераходнага Кабінета і прадстаўнік па транзіце ўлады Павел Латушка прапанаваў міністарцы падрыхтаваць інфармацыйную запіску для польскіх інстытуцыяў, з тлумачэннем санкцыйнай палітыкі, каб мінімізаваць выпадкі беспадстаўнай дыскрымінацыі беларусаў. Бакі дамовіліся стварыць агульную працоўную групу па падтрымцы беларускага бізнесу. Спрашчэнне рэлакацыі беларускага бізнесу ў Польшчы будзе для яго дадатковай абаронай перад палітычным пераследам з боку рэжыму. Падрабязней – на сайце Святланы Ціханоўскай.