Прапанова Лукашэнку, ад якой ён не зможа адмовіцца - ультыматум з боку ЕС і ЗША 23 верасня Павел Латушка адкрыў XX Мінскі Форум у Варшаве, якi прайшоў на тэму "Да новай Беларусі ў часы рэпрэсій і вайны: паміж чаканнямі і рэальнасцю". https://youtu.be/Slnzb4_lMY0 У 2020 годзе народ Беларусі паверыў у магчымасць перамен. І падняўся на барацьбу за гэтыя перамены, на барацьбу за Новую дэмакратычную Беларусь. Без дыктатуры. Без хлусні. Без Лукашэнкі. Мы паднялі над галавой свой нацыянальны бела-чырвона-белы сцяг і пад гэтым сцягам выйшлі на вуліцы сваіх гарадоў. Тады мы яшчэ не ведалі, што праз паўтара года гэты сцяг будзе значыць для нас само права на існаванне нашай нацыі. Мы не ведалі, што за ўсім гэтым стаіць доўгатэрміновая стратэгія Расіі, для якой Лукашэнка так старанна зачышчае будучы палігон для пачатку страшнай вайны Расіі супраць Украіны. Мы не ведалі, што пры поўным садзейнічанні яго марыянеткавага рэжыму адбудзецца фактычная акупацыя Беларусі і нашая краіна апынецца ўцягнутай у гэтую вайну, стане плацдармам для нападу на Украіну і саўдзельніцай страшных ваенных злачынстваў. Рэпрэсіі ўнутры Беларусі толькі нарасталі, а ўнутраны тэрор Лукашэнкі перарос у міжнародны тэрарызм: захоп самалёта Ryanair, гібрыдная вайна супраць Еўразвязу. Але нават гэта не прымусіла свет поўнасцю пазбавіцца ад ілюзій. Нават пасля міжнародных злачынстваў адэкватнай адказнасці рэжым Лукашэнкі не панёс. Так з тэрарыста Лукашэнка ператварыўся ў вайсковага злачынца. Так з незалежнай дзяржавы Беларусь ператварылася ў акупаваную Расіяй тэрыторыю. Так пачалася вайна супраць Украіны. Так чаканні 2020 года разбіліся аб рэальнасць 2022–га. Якая ж рэальнасць для Беларусі сёння? Якую Новую Беларусь мы можам убачыць заўтра? Праўда ў тым, што заўтра мы можам не пабачыць ужо ніякай Беларусі. Камусьці напэўна здаецца, што я залішне драматызую. Зусім не. На сённяшні дзень Лукашэнка з'яўляецца марыянеткай Пуціна, а Беларусь – акупаванай краінай. Палітыка паўмер, палітыка невырашэння маленькіх праблем заўсёды прыводзіць да праблем значна большых. Ці можам мы змяніць гэтую рэальнасць? Так, веру, што так. Але для гэтага патрэбная моцная палітычная воля. Значна мацнейшая воля і значна больш рашучыя дзеянні, чым тое, што мы назіралі ў дачыненні да рэжыму Лукашэнкі апошнія два гады. Пазбавіўшы Крэмль яго адзінага саюзніка мы можам змяніць ход вайны. І я перакананы, што свет усё яшчэ здольны зрабіць Лукашэнку прапанову, ад якой ён не зможа адмовіцца. Прапанова з пазіцыі сілы. Ультыматум. І толькі пасля поўнай дэакупацыі Беларусі, скасавання рэжыму Лукашэнкі і недапушчэння выкарыстання тэрыторыі нашай краіны для вайсковай агрэсіі магчыма будзе казаць пра Новую Беларусь. Жыве Беларусь! Слава Украіне! Поўная версія выступлення Паўла Латушкі: https://youtu.be/Slnzb4_lMY0