Новая беларуская прастора працягвае працу ў Варшаве https://youtu.be/xWktml6IZM0 У Варшаве да 17 жніўня працягваецца праца выставы Ігара Цішына "Дом, у якім разлятаюцца сцены" (падрабязней у інстаграм-акаунце музея), дэбют якой адбыўся 17 ліпеня ў рамках міжнародных дзён беларускай культуры ў Варшаве на адкрыцці новай беларускай прасторы ў Варшаве - Музея Вольнай Беларусі. Прастора "Музей Вольнай Беларусі" – пляцоўка ў цэнтры Варшавы, якая адчыніла свае дзверы для сустрэч усіх годных і таленавітых беларусаў, створаная дзеля захавання нашай гісторыі і падтрымкі беларускай культуры. Менавіта такія беларусы на працягу ўсяго дня выступалі перад першымі гасцямі прасторы – музыканты (Варшаўскі Вольны аркестр, Lity Taler, гурт 23.34, Уладзімір Пугач (J:Mors), акцёры (Вольныя Купалаўцы, "TEAM THEATRE", Паліна Дабравольская), Школа беларускай традыцыйнай культуры ў Варшаве, аўтары арт-праекта "Revolution". Моцныя эмоцыі ў гледачоў выклікала цырымонія перадачы ў фонд музея рэчаў загінулага ва Украіне сапраўднага беларускага героя - Васіля Грудавіка. У фонд музея былі перададзены яго асабістыя рэчы. Ярчэй за ўсё ўражанні ад адкрыцця Музея Вольнай Беларусі перадаюць задаволеныя, радасныя, задуменныя, часам са слязамі на вачах ад эмоцый, твары наведвальнікаў выставы. Дзякуем усім, хто далучыўся да гэтага важнага дня для Музея Вольнай Беларусі. Калі ў вас ёсць магчымасць і жаданне падтрымаць працу каманды НАУ: https://bit.ly/38KA2y0