10 000 грамадзян Беларусі абралі месцам жыхарства Беласточчыну У рамках рабочай паездкі Паўла Латушкі ў Падляскае ваяводства адбыліся сустрэчы с ваяводам Падляскім Богданам Пашкоўскім, віцэ-маршалкам Падляскага ваяводства Себасцьянам Лукашэвічам, Прэзідэнтам Беластока Тадэвушам Трускаляскім і кіраўніком групы па сувязях з Беларуссю Сейму Польшчы Робертам Тышкевічам. У рамках сустрэч дасягнуты дамоўленасці: - аб спрыянні стварэнню Цэнтра беларускай культуры ў Беластоку для патрэб беларускай этнічнай меншасці і беларускай дыяспары ў рэгіёне; - аб неабходнасці стварэння спрыяльных умоў для навучання беларускай мовы ва ўстановах агульнай адукацыі Беластока; - аб дадатковай фінансавай і арганізацыйнай падтрымцы навучання беларускай мовы і літаратуры ў школах Падляскага ваяводства; - аб падтрымцы мясцовымі ўладамі арганізацыі акцый, прысвечаных другой гадавіне пратэстаў у Беларусі. З 9 ліпеня 2022 г. беларусы, якія пражываюць у Падляскім ваяводстве, могуць падаваць у аддзел замежнікаў Ваяводскай управы хадайніцтвы аб атрыманні часовага віда на жыхарства па гуманітарных прычынах. Абмеркавана магчымасць назвы адной з вуліц Беластока "Вуліцай Вольнай Беларусі". Асобна адзначана важнасць падтрымкі беларускай этнічнай меншасці, якая пражывае ў Падляскім ваяводстве, сродкаў масавай інфармацыі беларусаў у Польшчы (Радыё Рацыя, тыднёвік беларусаў у Польшчы "Ніва"), правядзення беларускіх мерапрыемстваў у ваяводстве (фестываль Тутака і інш.). Павел Латушка таксама правёў сустрэчу ў сядзібе Радыё Рацыя з прадстаўнікамі беларускай этнічнай меншасці. У мястэчку Гарадок Падляскага ваяводства прыняў удзел у акцыі, прысвечанай палітзняволеным у Беларусі. Дасягнута дамоўленасць аб камунікацыі прадстаўнікоў этнічнай меншасці, беларускай дыяспары Падляскага ваяводства з камандай Народнага антыкрызіснага ўпраўлення і мясцовымі ўладамі для вырашэння праблем беларусаў, якія пражываюць у рэгіёне. Па дадзеных Ваяводскай управы, каля 10 000 беларусаў пасля жніўня 2020 атрымалі статус часовага знаходжання на тэрыторыі ваяводства.